Ջերմուկում օդը մաքուր ու թափանցիկ է, կլիման՝ լեռնային, ձմեռը՝ երկար, ձյունառատ: Ջերմուկը ջրով հարուստ տարածք է: Քաղաքի տարածքում կան տաք և սառը աղբյուրներ, որոնց ջուրն օգտագործվում է խմելու համար, սակայն Ջերմուկը մասնավորապես հայտնի է իր բուժիչ տաք աղբյուրներով, որոնք ունեն հարուստ քիմիական բաղադրություն:
Պահել
Ջերմուկ առողջարանային քաղաքը հիմնադրվել է 1935թ.-ին, քաղաքի գլխավոր հատակագիծը կազմվել է 1945թ.-ին, սակայն քաղաքի բուռն թափով զարգացումն սկսվել է 60-ական թթ., երբ սկսվեցին կառուցվել առաջին առողջարանները: Ջերմուկը խոշոր, առաջին կարգի ջրաբուժական և կլիմայական հանգստավայր է: Քաղաք-առողջարանը գտնվում է Հայաստանի հարավ արևելքում, հեռավորությունը Երևանից 173 կմ է, տեղանքը գտնվում է ծովի մակարդակից 1980-2080մ բարձրության վրա: Սարահարթը, որտեղ զետեղվել է քաղաքը, երեք կողմերից շրջապատված է անտառապատ լեռներով, ծածկված թարմ ալպիական բուսականությամբ: 1975թ.-ին, երբ Արփա կիրճի վրա կառուցվեց հայտնի կամուրջը, հնարավորություն ստեղծվեց զարգացնել նաև կիրճի ձախ ափի բնակելի հատվածը: Այսօր Ջերմուկը զարգացած ենթակառուցվածքներով ժամանակակից առողջարանային քաղաք է:
Կարդալ ավելին
